2014年5月23日 星期五

麥皮曲奇

好耐冇貨交了!至從趕完第三冊漫畫後,又要趕食譜。雖然唔知會唔會爛尾,any 肥盡力吧!
喺呢度真係要多謝各位對也加子嘅支持,也加子第三冊漫畫又托各位的福,幸運地登上𣈱銷書榜欄上的某位置,確實真係要乾杯乾杯!(笑)


好了,食譜雖然要出,但冇奶油將所以筍嘢全部lock實哂唔分享字姐!?香港人出名冇乜耐性架麻(包括我自己),哈哈!正因如此,點都要嘔一個出來應酬下嘅!(爆)

今次想分享的,係一個我宵夜成日吔嘅東西!雖然臨瞓前係減肥大忌,但因為早食飯又夜瞓嘅関係,真係餓到胃都消化埋⋯ 結果又開珍珍,搵積及,更死得嘅係淥麵開五香肉丁!(冏)
大佬,咁搞法唔肥真係砌乜比你都得啦⋯ 唉,冇辦法啦!我個五行"食"字大旺了!所以要諗計仔,整D見倒唔會買,買左唔會用,用左又唔知嘅嘢!(爆)

係乜?no no no! 唔係棺材!(爆)
謎底係用麥皮做嘅曲奇嘅!嘻嘻。

毎次見倒麥皮唔會買,因為難食。買左又唔會用,因為怕麻煩!但今次用左皇帝佢地又唔會知!係未洗得先?哈哈!


材料:

1/. 麥皮 70g
2/. 低筋麵粉 30g
3/.  砂糖 20g
4/.  鹽   兩執仔
5/.  菜油 30cc (2湯匙)
6/.  水 30cc (2湯匙)
7/.  朱古力  20g 
8/.  果仁 20g (合桃, 開心果, 杏仁, 夏威夷果⋯乜果仁都得!up to u)

做法:

1/. 材料7同8先砌碎粒,備用。



2/. 材料1至4全部放落大兜裏,用膠刮搞拌好。

3/. 加油落步驟2,用膠刮𠝹勻,之後落朱古力&果仁碎。再兜勻!


4/. 落水到步驟3,𠝹勻後,用手壓成一團,(若覺得太散壓唔成一個粉團的話,可加少少水,分量不可超過1湯匙)。

5/. 用匙羹筆起一粒直徑2cm大嘅球狀,放上已鋪好牛油紙嘅焗盤上,用手再軽軽壓扁成一塊直徑約3.5cm大嘅圓餅。(全個粉團大約可做12至15塊。)


6/. 焗爐預熱180度,焗17-20分鐘、禮成!

你地睇皇帝食到幾知音!?
哈哈.... 

呢個麥皮曲奇,係我喺日本某網站上睇返來的,並非係我原創。大家唔好誤會呀!我只係將佢譯成中文同大家分享架咋!
呢個係試過咁多個來講最簡單易做又好味嘅!成個準備工序前後唔洗15分鐘就完成。非常正斗。大家不妨喺今個週末無聊時試試啦!嘻嘻。