2015年6月1日 星期一

娃娃的廣東話第一課

上星期同在日香港人聚會完,認識了朋友的囡囡。見人地中日文對答如流,我就將此事同娃娃講了。娃子聽後心有不甘,原因係後悔自己點解身為混血兒又唔學好廣東話。見身邊D混血兒同學個個撚得至少兩種語言,自己就兜兜踎踎岸周周、連老豆D廣東話都好過自己,諗多兩諗,之後偷偷地匿喺廁所喊(爆)。

我認我自已講話正腸正肚,呢頭食嗰頭痾。所以娃娃自小比我hurt大,訓練得銅皮鉄骨(爆)。平時叫佢講廣東話佢又死都唔肯講,只會對住D完全唔懂日文嘅人面前先死死地氣up兩嘢⋯⋯ 唉!除非你成世諗住踎日本啦。咁就乜野語言都慳返!

最近因為娃娃自己有手機,見我同阿媽佢地狂用中文chat, 自己又話想加入。

加條毛咩!我話你都唔識廣東話,除非你識講啦!但識講又未必等如識寫禾。因為廣東話真係好難。不過咁,如果你肯真心跟媽咪學的話,半年應該打倒D基本嘢嘅⋯⋯ 因為你媽咪我話哂都曾經係一名教師,教過嘅學生無數。( ´ 益 ` )hihi...

老實說,不兜圈,這番話是真的。

七八年前在橫濱時,也加子曾經是一位頗猛嘅廣東話教師(爆),廣告配音員幕後工作加翻譯等等。私人教授到宜家都有,所以我已經習慣左如何將一個完全唔懂廣東話嘅日本人,經我訓練後変得對答如流。只要你肯比我鬧&鵝,有D學生甚至試過比我鬧到面都紅埋,但都繼續學(爆)、最後當然畢埋業,做埋朋友添(笑)。

娃娃聽完我D歷史,比埋以前我出過嘅試卷,功課,教科書佢睇後,終於肯決定的起心肝學好廣東話了。

首先,我會用返以前嘅教學方式教娃子。同日本成年人一樣,因為佢漢字已有中二程度,所以問題唔大。只要佢肯死記同唔好將日文漢字混在一起就OK了!

以下是娃娃尋日學嘅東西。


每日少少,唔需要一次過質太多佢嘆。比起生字,我會較在意佢地D發音。所以廣東話九個高低語調一定要學好,拼音一定要串得啱。



路途雖然遙遠,但只要有肯心,肥婆都會變大長金。娃娃,生吓性,努力喇!( ´ 益 ` )hihi...