娃子的９歳生日會

娃子生日會終予圓満結束喇(笑)！

好多謝各位哥哥姐姐、EE督督嘅祝福。小娃子感激不盡呀。

 

今年嘅生日會真係由星期六食到星期一、傻咗‼　娃娃応該好満足啦(笑)

首先、今朝一早就無啦啦有人按門鐘搵娃子‼　

 

睇睇係乜水啦？原來係娃娃個朋友喎。

▼　通話機。

因為今日係日本嘅公衆假期唔洗返學、所以朋友媽咪特登咋車車自己個女嚟搵娃子、之後将生日礼物連信交俾娃子。佢個朋友真係唔話得喇…　

而家啲細路真係有哂自己圏子、有哂自己主義、再唔係以前咁拾拾吓架喇(笑)

到左下午用膳時間。

 

娃子要求我整個有温泉蛋加生火腿嘅香蒜意粉。
好！你生日、大哂架嘛。就聴你點一次啦。　

呢個女呢.... 真係咀挑到爆。

拿、第時阿媽老到行唔郁想食個咸蛋肉餅嗰時記得整俾我食呀(笑)。

 

▼　娃＠好開心。

▼　ご馳走様でした。（我食飽喇）

到左夜晚、又係娃子嘅注文。

今次唔食西餐、要食泰國野(爆)。

不過好在佢前兩日巳経同我講定、我先有時間去買香草咋、你估我真係開餐廳、臨時臨急乜都嘔倒俾你嘅咩！？(爆)　

 

▼　拿、我而家準備緊喇。知唔知係咩呢？

▼　出場喇‼　就係泰式香草炒鶏肉囉。佢重要我加蛋！娃子你今日巳経食左兩隻蛋、今個星期唔準再食喇(爆)。

其実呢隻炒肉粋我覚得辣少少會正啲、
但因為自己皮膚唔好、少辣會好啲！再加上娃子又要食、
我巳経軽手咗好多架喇。( ´益`)hihi．．．．

最後、到皇帝出馬‼( ☉_☉)　

今次娃子本来要求我整個薔薇味嘅生日cake俾佢嘅。
都ok！我都応該整得倒嘅、但點知無啦啦屎窟痕話想要個薫衣草芝士蛋高喎！
(｡-_-｡) 

 

吓？唔好玩喎阿女…　

咁難度高嘅野、阿媽做唔倒囉。

最後、阿也四孝老豆皇帝決定挙手自薦要整‼　( ☉_☉)

 

嘩！皇帝好耐冇整甜品俾我地食喇…　

 

今次居然為咗阿女乜都肯整！都話阿女講一句好過我講十句架啦。
如果我生日時要皇帝係噉依整杯薫衣草茶俾我飲嘅話、
佢可能只會叫我自己去厠所搵(爆)。

拿、冇花冇假、等娃子瞓咗後、皇帝就去厨房度洗出真工夫、啲食用薫衣草全部自己買的、之後自己煲自己煮自己諗材料、試味各様。你地唔以為網上有寫有教喎、冇架！全部自己諗。

完成後…

皇帝努力地画娃子(爆)、重寫埋中文。哈哈哈～　

 

▼　亀亀昅到実、以為有自己份噉(笑)

▼　嘩！主角出場、開心到爆。亀亀妹妹都一斉出席喎！
但亀妹麻煩你啲動作唔好太大、因為你毛多呀知嗎？(爆)

(其實我唔識點放短片上來。因為見一一妹妹個video真係好sweet, 所以好想同各位分享的。但試過，都係失敗！）

▼　許個願先！　

但睇嚟娃子重未知道個芝士蛋高其実並非普通芝士cAKE。

▼　切cAKE。今次都係唔多夠力、下年応該得架喇(笑)。

▼　嘩、娃娃你EAT YOURSELF? (爆)

▼　娃娃終予發現咗！！　薫衣草呀。好正呀！
重笑到差啲噴咗出嚟天。(爆)

▼　皇帝都笑自己係天才(爆)。真係飽死荷蘭豆(爆)

▼　真係薫衣草芝士Ｃａｋｅ、唔係講笑啵！

９年前嘅今日、媽咪難産、要用咗２７個鐘頭先誕下娃娃。

媽咪生你生得好辛苦架、記得要孝順父母、唔好學壊呀。

祝娃娃生日快楽、身体健康❤️。