交友

娃子最近有煩惱之⋯⋯⋯

交友。

因為文章太長，決定打上blog, 留言歡迎可到我專頁上放屁。(笑)

話說娃子本來有3個死黨：

1/. 家養大貓的S小朋友，

2/. 富家女家有兩座山大地主L小朋友。

3/. K小朋友(1年班時曾欺凌過娃子改娃子叫春袋子的那位但其後和好)。

但上左4年班後，無啦啦殺出一個轉校生M小朋友來(中日韓混血)，加入佢地堆裏。

本來玩得好地地，但事隔數月嘅今日，M小朋友向S同K小朋友講L是非，成功離間後，最近M連同S＆K小朋友齊齊向娃子埋手，叫娃子唔好睬L。但可憐的L到現在還不知情⋯

人物介紹：

L：係一個非常有義氣但比較自傲嘅小朋友，家教好好。好文靜，忽冷忽熱。班中成績同娃子同樣是最優秀的，但L做人唔夠圓滑，經常比人覺得佢高傲，得罪人多(包括M)。但娃子就on膠膠，儍人有傻福。娃子同L兩個行埋唔係講玩乜game, 而係大家互出試題考大家，唔懂就互相指導，所以佢好少朋友，但就好珍惜友情嘅人。

M：我唔太懂佢，只知佢係街童feel, 鐘意蒲機鋪，公園＆講fashion!  好動。

S: 品性良好，有教養，好口才，同娃子由細玩到大，好動，愛貓(笑)

K：話頭醒尾，分析力高，冷靜形，心地好，有教養。但我同佢老母唔多夾。

娃子話，最近好唔開心，返學唔知同邊個講嘢好，又唔知應該埋邊堆好。同L玩，又怕冇左M黨堆friend, 但L有情有義，真係唔知想點...  

如果埋錯堆，又怕被欺凌！該怎麼辦？

同M黨襯，但暗地裏同L做friend? 

不過如果將實話同L講清楚，L一定會嬲娃子，繼而L會質問M，最後娃子會変成是非人，大家連朋友都冇得做。

雖然我唔鼓勵娃子做長頭草，但喺大和吓吓要講埋堆，有冇方法可兩存其美呢？

四年班的女孩，終於要面對大和八婆生存之道了。

18：30

今日放學後回家，娃娃同我講收到M的信。😢😢

內容話；M自己比L欺凌，所以M寫信叫娃娃同L保持距離。最後重叫娃娃回信😱。

咁當然娃子知L一定唔會欺凌M啦！內容全老作⋯文字裏重充滿仇恨，咀咒，又將L個名寫上厠紙上然後冲落厠所。🙊🙊🙊

不過娃娃同我講，無論如何佢都企硬一定會中立禾⋯👏👏👍