韓國前菜 Namul

韓国料理前菜我勁喜愛、石頭飯更LIKE！
前個月同韓国人太太開村長會時、見人少少就走埋去問佢整前菜秘訣。

其実韓国料理嘅前菜嚟嚟去去都係嗰幾様野、只要你有手有脚就係人都識整。唔係芽菜仔就係薇、波菜各様架啦！
但要想知自己整得係唔係正確、都係問清楚好啲！

拿、先講明先！因為我頭先口罕罕求其喺専頁UP下、話如果超過300人俾LIKE就上BLOG写野。

点知真係比我扼夠OVER 300個LIKE。。。( ☉_☉)

(爆)

冇啦、做人要有信用架麻、
写啦写啦！
（￣ v ￣ｌｌｌ）

因為頭先整時冇諗住上BLOG、所以冇影噉多STEP相、調味料分量又冇量清楚、真係唔好意思、すみません！
(爆)。

費話少講、先去睇睇材料！

~☆~☆~☆~☆~☆~☆~☆~☆~☆~☆~☆~☆~


●材料: 

① 芽菜仔   1包  
② 波菜       十数条
③ 薇 (大巣菜) 一包包水煮左果啲。

唔知係乜？

其實⋯ 係植物嘅一種。(爆)

上網搵返來嘅！唔係我種的。聽聞佢地生歐歐時好似成枝遮柄咁嘅。

(搵唔倒的話用菇類or牛蒡各樣代替啦！)

④ 白蘿蔔(大根) 

石頭飯用:   
⑤ 免治肉碎 ⋯ 約80g


【調味料】
(大1=1湯匙15cc; 小1=1茶匙5cc)

① 芽菜仔用:  
味付胡椒；少少、海鮮味粉; 小1/4、麻油; 適量。

② 波菜用: 
韓国醤油; 大1、砂糖; 小1、日本無添加鰹魚味; 少少、麻油；少少。

③白蘿蔔:
日本酢; 大3、砂糖(冇量到Sorry)、韓国紅椒粉; 小2。
(冇紅椒粉的話加少少紅蘿蔔糸代替都OK)

④ 薇用:
水100cc、料理酒少少、韓国醤油; 大1、砂糖; 小2、韓国味噌適量、韓國牛肉味粉小1、蒜粉少少。


~☆~☆~☆~☆~☆~☆~☆~☆~☆~☆~☆~☆~

●做法:

① 芽菜：
洗浄、焯熟(煮3分鐘)、倒落笊基注水過冷河、洒塩、用手搓至出水後、
試味、太咸的話用水略洗。 之後加調味料①。

② 波菜:
洗浄、切段、煲水。水滾後落1茶匙塩、焯2分鐘。(茎部先落水、煮夠1分鐘後先落其他部分)
上水落笊基、馬上冲凍水。浸冰水最好！鯨乾後、将淥好嘅波菜舗上寿司席上、
巻埋一碌、用手咋走水分。加入調味料②。

（其實成條菜就咁淥, 淥完先上砧板切段係最理想，但我懶，所以淥前先砌左段。）

③ 白蘿蔔:
切条、落1茶匙塩用手狂拃&搓至蘿蔔糸変軟身。冲水洗浄塩味後盡量拃乾。
加入調味料③、攪伴、放入雪櫃雪1～2小時。

④ 薇:
洗浄、用麻油略炒、加入調味料④、慢火炆8分鐘。(炆時開少少蓋)

注：冇薇改用菇類就5分鐘都夠了！

(注: 落調味料前請先将佢地全部攪勻喎)


※ 最後、所有東西放芝麻！
(白蘿蔔除外、白蘿蔔落紅椒糸)

■ 如Namul嘅話、喺碟上排好後先洒芝麻。
■ 用嚟做bibimbap就舗好上飯面後先落芝麻。



※石頭飯bibimbap変身！

石頭飯TOPPING有兩種、一種係冬天用、一種係夏天用。
可能係人都知、不過等我講下握下字数啦吓（笑）。

常見嘅当然係冬天版啦！不過夏天版都不錯、類似野菜沙律噉、
用來減肥最好、又好味又健康！但今次唔講夏天版住、
留返個QUOTA出BLOG(爆)。

冬天版石頭飯:
只要将以上材料全部切好上飯就攪掂！
不過個肉我未講点整。 HIHI

首先、用來炆薇嘅汁唔好掉、因為要用佢來炒肉。



●做法: 

① 肉碎:

用麻油炒肉、加少少姜容(唔要都得)、洒少少韓国料理酒、日本嘅都OK!  但唔要広東米酒嗰啲！炒香後加入炆完薇嘅汁、再加少少韓国味噌、攪勻、煮至収汁。 完成！

② 荷包蛋:

唔準笑！ (爆)  因為有同学発問。
拿！求学係好事。 蛋呢様野都有少少技巧架喎（笑）。

‐ 落油、焼熱隻鑊後、保持鎮定(笑)、打蛋落去。(蛋要新鮮)
‐ 見蛋白変白色後、用鍋剷軽軽摌下、確認佢冇痴底後、加少少水(約30〜40cc)、馬上冚蓋，
‐ 転中火。久唔久裝下個蛋黄面有少少白色噉就OK熄火、上飯面。

石頭飯TOPPING:

順序：白飯、紫菜(可以唔要)、蛋黄OR荷包蛋、前菜(加埋泡菜喎)、韓国味噌、最後洒芝麻、麻油。 得左！ yeah....

韓国人太太話，蛋要最後放上面、
但我覚得放底會好睇啲、所以。。。。
隋你地喜歓啦。

好攰、點幾鐘、要瞓喇。zzzZ

應該有好多字打錯，明日先改喇。

哈哈！

好！

祝你地成功、我要搵周公。(爛)

英式鬆餅 (Scone)

好耐冇上嚟BLOGGER出BLOG喇、頭先要摸左一排先摸倒入嚟。激到我嘔電！

唉、都係嗰句、雖然YBLOG係有點西、但其実佢係OK架（笑）！

見FACEBOOK度噉多朋友話想要Scone食譜、
好啦、快手喺度打一篇俾你地交住貨先。(' 益 ')
呢個SCONE勁簡単、我成日都整架！因為係娃子茶点必備。
唔係曲奇就係佢、全部当然要快靚正同簡単。(^_^)v 😂😂

首先睇睇材料:


✳︎材料:

① 低筋麺粉 190g
② 奶粉 10g
③ 發粉 10g
④ 砂糖 15g
⑤ 無鹽牛油  60g
⑥ 鮮奶 60～80ml  (按自己喜愛硬度)

做法:

① 牛油切粒、備用。

② 将材料①～④全部倒入一個大兜裏面攪勻後、
加牛油粒、用Cutter、Cut細啲牛油、一路斬一路攪勻。

③  斬無可斬後、最後用手搓走大粒嘅牛油碎、搓到佢好似D擦紙膠碎噉就岩嘞！

由於左手要咋機影相關係，所以得右手卒粉。記得用兩隻手一齊卒禾，如果唔係盤粉攤暖左, 做出來嘅餅就唔多理想架喇！

④  加鮮奶入步驟③、略攪。

切忌用力擠圧、係咁依搞勻就ok架嘞。最後撚埋一舊粉団、用保鮮紙包好，雪半個鐘至一個鐘後取出，放上一塊洒左麺粉嘅砧板上。用曲奇模cut出嚟又好、菜刀斬件又好、
総之一定要用金属質地嘅東西Cut個餅出嚟。我就用菜刀砌成正方形塊算了，因為趕時間(笑)。又或者學沙筆咁砌又得！但記得厚度要有2cm禾! 

 CUT完後絶対唔好用手摸倒D餅嘅砌口位禾、否則個餅就會昇得唔夠高架喇。

⑤ 焗炉予熱200℃、焗15至20分鐘。攪掂！
(火力唔同請自行判断)

焗好後取出，放上鐵龬上㰙凍。之後先好入樽呀！

好吸引耶！☻☻

*･゜ﾟ･*:.｡..｡.:*･'(*ﾟ▽ﾟ*)'･*:.｡. .｡.:*･゜ﾟ･*

➡︎秘訣:

牛油同鮮奶一定要凍！
否則個餅會唔夠ZONE化。

呢個鬆餅夠頂肚又好味、可以整嚟做早餐又得、TEA又得、
帯返公司請同事食又得！ 得左。

娃子最鐘意攞佢嚟送牛奶食、佢話簡直一流享受！

嘻嘻☻

Porcini Risotto （牛肝菌意大利飯）

上星期五係我也加子牛一，

可惜平日皇帝又倒牌要加班，娃子又要做功課各樣，做人要互相體諒架麻，咁慶生就延至翌日吧。

不過星期五呢晚冇奶油食黃蘿蔔漬物送假？咁就唯有煮餐自己鐘意食嘅嘢氹下自己開心啦！

也加子愛吃菇類，愛滑子茹，雞肶菇，松茸(爆)，重有porcini(牛肝菌)。唔知中文有冇譯錯！

呢隻菇係極品，愛佢夠香，濃郁，夠甘，行過見倒有嘅買來試下啦！

今次我用左佢來做意大利飯，本來想做意粉，但因為唔知皇帝何時回家，等到佢返來D意粉都変哂回頭麵(爆)，成𠾍嘔嘢咁就失真啦！？Risotto凍左丁返熱都OK嘛！就拍板整佢啦!

以下東西我係上網搵的。宗合三，四個食𧪽，參考最好部分再加少少自己意見而寫成的。比起一般cheap cheap餐廳來說，我覺得呢正得多(失禮)，所以決定攞上來同大家分享吧。

材料：

①Porcini乾（牛肝菌）　１５ｇ

②温水　 150㏄

③洋葱　　1/4個

④高湯　 600cc

⑤白米　　１麦（200cc）不用洗。

⑥牛奶or鮮忌簾  30cc

⑦白酒　 30㏄

⑧蒜粉　適量

調味料：

①鹽　　　  ２小執

②黒胡椒　  適量

③無鹽牛油　1０～２０g

④芝士粉　  適量

做法：

①　将材料①用水喉水洗浄、之後放落温水裏浸１小時。

②　洋葱切粒。

③　将浸左菇嘅水用厨房紙隔咋、倒落煲中再加高湯、略煲、備用。

④　Porcini菇切粒。

⑤　Olive oil炒洋葱粒、見透明後落白米、再落Porcini菇、同様啲米変透明後、加白酒、待酒精蒸発咗後、加高湯。（冚過米面少少）

⑥　湯滾後轉細至中火，半冚蓋。久唔久昅下佢。見少咗水、再用個湯殻畢一羹、倒啲上米面。

⑦　以上Step重覆做到啲米変飯、參考時間，大約用17至20分鐘。途中盡量唔好行開唔好郁佢唔好攪。就算要郁的話、係噉以揺吓佢好喇。因為費是鑊飯変咗Pet嘔野。起左膠唔好食。(最後3分鐘左右可開蓋煮至收水）

⑧　最後Saa蒜粉、牛油、鮮忌廉，芝士粉，鹽兩小執、黒胡椒、軽軽攪勻。再試味，唔夠就再加少少鹽，分量就自己喜好啦。（見議每次用手乸小小）

上碟後可再加少少芝士粉同鬼佬芫茜，食得！♪(´ε｀ )

✳︎Tips: 

1/.牛油最後先落，一開波就用牛油炒，好滯同油膩(個人意見)。放在最後落，牛油香味唔會走哂之余，分量又唔洗太多，用來吊味夠喇，咁碟飯先會冇咁俗氣。

2/. Olive oil我會用呢隻！porcini嘅olive oil, 開蓋聞一聞，未食先醒神。

3/. 因為怕肥又要食，我就落一半牛奶，一半鮮忌廉。鮮忌廉落15cc, 冇奶油特登走去買一大盒返來咁嘥啫，所以我就去嘆咖啡時tark多一個.............▼

嗱，唔好話我cheap, 

慳家啫！(爆)

下面呢個係porcini(牛肝菌)嘅實物相，網上面ul落來的。

好鬼cute!

似唔似孖寶兄弟果D毒菇呢？haha

搵唔倒佢的話，用磨菇都OK，但冇咁香，好過冇啦。

因為磨菇唔洗浸嘅關係，

高湯就要增量，用750cc!

除左個risotto, 財神奶奶又寄左啲意大利直接到步嘅急凍pizza比我開party. 因為大家都係主婦，生日都要自己煮好冇陰公架麻，送錢又送pizza, 我呢個奶奶真係唔話得！(^-^)

又軟熟又多汁，真係好鬼正！

我的Risotto, 下次用來招呼D大和太太佢地都夠撐呀！嘻嘻....

雖然唔係pro, 但味道真係得。

大家都不妨擇個日來試試啦！

白汁明太子焗薯蓉

(*´ｪ`)　hehe…

 

尋晚煮完兩個餸覚得dry dry地、之後就想整多味伴菜吔啦、

喺雪櫃裏面求其搵倒個薯仔、腸仔各様、

就決定用呢啲乗余物資、求其諗咗味餸出嚟。

 

做法簡単、前後兩三吓手脚都唔洗３個字就夠掂喇！

 

整完焗完上台、皇帝同娃子見倒重鬼咁歓喜！

皇帝知我最近巳進入趕稿状態、忙到爆、

就叫我啲料理一切従簡唔洗咁認真(笑)（甜）

 

 

講真呢味野、

個様真係握得倒人架(爆)。

 

唔講唔知以為你整得好辛水辛汗嗰隻、

其実求恋其到爆！

 

拿、不論你係未処予求恋期都好、

用嚟招呼朋友or自己一条友吔都一様咁啱架。

 

去片！

( ´益`)hihi....

 

~☆~☆~☆~☆~☆~☆~☆~☆~☆~☆~☆~☆~

 

 

◎　材料：　

 

①　薯仔…………１個（細嘅）

②　鮮奶…………２００ml

③　牛油…………１５ｇ

④    低筋麵粉⋯⋯1湯匙(15cc)

⑤　腸仔...…...……２条（用嚟做八爪魚嗰隻、細Size）

⑥　糯米粒…...…適量

(搵唔倒的話可用pizza芝士代替)

⑦　明太子醤……一個

(冇的話成條明太子上，用羹壓出魚春)

⑧　面包糠(乾身果隻)………適量　

⑨    芝士粉..........少少

 

◎　調味料：　

 

鹽、黒胡椒………適量。

做法：

①薯仔去皮切薄片(5mm)、平舖放在碟上(for oven用嘅碟)，再灑下少少塩同胡椒粉。

[注意：鐘意食薯蓉嘅朋友可將以上步驟做完後可在薯仔面上噴少少水，原碟蓋上保鮮紙，再放入微波爐丁4至5分鐘，取出，壓爛。]

② 腸仔砌片，鋪在①上。

③ 灑下糯米粒，加少少芝士粉，最後吱D明太子醬上去(如圖下所示)

 

④ 將牛油丁溶後，加低筋麵粉1湯匙(15cc)，用匙羹撹成糊狀。

⑤ 鮮奶倒入煲裏(細煲為最佳)，落④，撹匀後開中火，見煮到開始杰杰地後，再轉慢火，加少少塩(用手揸一執果隻)，熄火。

⑥ 將以上白汁倒在③上。在加少少明太子醬，灑上麵包糠。(如圖下所示)

⑦ 焗爐預熱好後放入去焗到個面有微微地金黃就完成喇！

因為我果個焗爐係全自動嘅關係，所以唔知用幾多度(爆)。以我經驗，一般來說，180至200度焗10分鐘都OK。因為我唔鐘意太乾&爖。（焗爐火力有別，只供參考。）

⑧ 取出，加少少鬼佬芫莤，灑上紫菜碎，撹掂！

▼ 呢隻就係我用嘅明太子醬喇！for 2人前。其實係本來用嚟落意粉食嘅，不過経我動動腦筋後又多一個食法喇。哈哈！

▼ 拿，有哂紫菜喺𥚃面，個醬一個for1人分量嘅。

我知市面上有D明太子蛋黃醬賣，但我唔見議用佢，因為蛋黃醬係用油整，用佢嘅話成碟嘢就會好油利，唔多好味。

▼ 糯米粒。我整雞球時成日加少少落去撚，好正！不過重有好多用途，鐘意糯米嘅朋友不妨入貨啦！

如果搵唔倒糯米粒嘅話，可用pizza芝士代替，一様好味！

▼ 因為怕肥但又要食，所以我用左隻低脂奶。呢隻低脂奶好好味！唔同一般果D師姑尿咁淡而無味，值得一推！♪(´ε｀ )

▼ 好了，又繼續返回我個巢穴裏趕稿喇！
趕稿我慣左一定要卸哂妝，因為皮膚唔好、所以⋯

This is a ⋯

素顔四眼超全面睇！

唔洗點撹都夠嚇鬼。(爛)

 

VIDEO testing:

味付卵（味付糖心蛋）

上幾篇喺度同大家分享過如何整半熟卵（糖心蛋）、今次呢個味付糖心蛋其実係佢嘅変身版、即係進階。(笑)

如果未整倒糖心蛋嘅朋友、不妨再努力研究多幾次、一定得！失敗原因唔係自己冇天份、問題係在予毎隻蛋嘅大細有別、有時手脚慢咗３０秒（半分鐘）都會令到隻蛋個芯唔夠透明。

要做日本拉麺店嗰啲味付糖心蛋首要条件就係隻半熟蛋一定要透明色。否則個味付蛋就唔夠正( ´益`)hihihi....

▼切開比你地睇下個芯先。拉麺裡的味付蛋首要條件，做味付出嘅半熟蛋個黃要半熟至透明狀態。流出嚟果隻。

 

▼網友Sabrina的成功例子。

 

 

▼　網友Alice今日又成功咗喇～♪

 

嘩、唔係講笑、

真係靚到漏！！

 

多謝哂你地嘅相片提供。

♡o━━━ﾟ(∀)ﾟ━━━ o♡

 

如果想整4隻味付的話，冇信心嘅朋友，我見議烚5隻先，烚好後攞一隻出來切開睇下個結果是否適合，費是嘥你豉油嘛。

先睇睇材料：

 

①　半熟蛋（糖心蛋）３～５隻。

②　日本料理用酒　７湯匙

③　味醂　　　　　4湯匙

④　砂糖　　　　　半〜三分二茶匙

⑤　日本萬字醤油　2.5湯匙

（以上係參考調味料分量，我覚得就啱啱好喇。不過鐘意少咸嘅朋友，請自行調節。）

●浸蛋汁做法：

1/.  先将②同③倒入煲裏煮沸、目的係将啲酒精蒸発左去。 

 

注意：切忌煲太耐，少少滾滾地，因為蒸發哂D水份就唔夠浸加咸得済架喇!

2/. 之後落④、攪到溶為止。

3/. 最後加⑤落煲裏齊齊攪。息火、灘至常温。

4/. 準備乾浄膠袋一個、碗一隻（放蛋用）。将準備好嘅半熟糖心蛋放入膠袋裏、之後注入浸蛋用嘅汁料、最後打個烈、最好唔好俾佢有空気啦。継而将呢袋蛋放入碗裏（如図）。

Tips: 先喺隻碗裏舗好膠袋、等個膠袋唔好軟奶奶、免得倒寫。

５/. 放入雪櫃等半日至１日。完成！

膠袋連碗齊齊入雪櫃、目的係等佢企身啲、蛋面蛋底都完全受浸。

▼切開，上碟，得左!

▼呢堆蛋就浸左日半嘅。

嗯，好濃味! 

For送酒用or送飯食，簡直一流! 

Ｎ年前喺呢度Post過、経過数年後又再度改良( ´益`)hihi....

形成今日的蛋(笑)。希望可以再研究多啲、下次可再簡単啲！

另外、味付蛋重有好多方法整架。

上星期見超市啲猪軟骨做特価、就買左兩合返屋企用嚟忟個日式猪軟骨、正到氹一声！呢個真係値得推推(爆)

蚊完肉、等啲汁待常温後放糖心蛋、雪一日、第二日整返熱佢之前攞返啲蛋出嚟。味付蛋都可以係噉整架！係未快靚正呢？

▼之後送麵食，yeah! 

方法②

鐘意整老水嘅朋友、又可以攞啲老水汁嚟浸蛋呢！咁就変成中式老水糖心蛋囉！

鐘意煙薫嘅又得、點食都得！ 

( ´益`)hihi....

希望各位喜歓啦！

多謝哂。 

成功後唔介意嘅朋友，影張相俾我啦，我同你地貼堂呀下!

哈哈！